OKB alarmon: Kemi edhe dy vjet për të shpëtuar planetin

Qeveritë, bizneset dhe bankat e zhvillimit kanë ende dy vjet për të bërë diçka për të shmangur ndryshimet më të këqija klimatike, tha shefi i klimës i Kombeve të Bashkuara. Shkencëtarët pohojnë se është e nevojshme të përgjysmohen emetimet e gazeve të dëmshme serrë deri në vitin 2030 në mënyrë që të parandalohet rritja e temperaturës me më shumë se 1.5 gradë në krahasim me periudhën para-industriale. Dështimi do të shkaktonte mot ekstrem dhe nxehtësi. Pavarësisht kësaj, emetimet e dioksidit të karbonit u rritën në nivele rekord vitin e kaluar dhe premtimet aktuale të vendeve për të luftuar ndryshimet klimatike, nëse përmbushen, do të reduktonin vetëm paksa emetimet globale deri në vitin 2030.

Simon Stiell, sekretari ekzekutiv i Konventës Kuadër të OKB-së për Ndryshimet Klimatike (UNFCCC), paralajmëroi se dy vitet e ardhshme janë "vendimtare për të shpëtuar planetin tonë". “Ne kemi ende një mundësi për të reduktuar emetimet e gazeve serrë me një gjeneratë të re të planeve kombëtare të klimës. Por ne kemi nevojë për plane më të forta, tani!”. Duke folur në konferencën e grupit të ekspertëve Chatham House në Londër, Stiell tha se vendet e G20 janë kolektivisht përgjegjëse për më shumë se 80 për qind të emetimeve globale dhe për këtë arsye duhet të veprojnë urgjentisht. Qëllimi kryesor i negociatave të këtij viti për luftën kundër ndryshimeve klimatike në OKB është arritja e një marrëveshjeje për financimin e vendeve në zhvillim që kanë vështirësi në tranzicionin nga lëndët djegëse fosile.

Stiell tha se paratë mund të sigurohen përmes faljes së borxheve, huamarrjes më të lirë për vendet më të varfra, burimeve të reja të financimit ndërkombëtar si taksat mbi emetimet e transportit dhe reformës së Bankës Botërore dhe Fondit Monetar Ndërkombëtar. “Çdo ditë, ministrat e financave, drejtorët, investitorët, bankierët e klimës dhe zhvillimit drejtojnë miliarda dollarë. Është koha që ata të ridrejtojnë ato dollarë”, theksoi ai.

Në një vit 'superzgjedhor' ku votuesit po hedhin votat e tyre nga India, Afrika e Jugut, Evropa në Shtetet e Bashkuara, Stiell tha se veprimi i klimës shumë shpesh "po rrëshqet nga axhenda e qeverive". Politikanët si kandidati republikan Donald Trump  ose partitë e ekstremit të djathtë në zgjedhjet e ardhshme evropiane po refuzojnë politikat klimatike në mënyrë që të kënaqen me votuesit.