Fjala e autorit

I nderuar lexues,

Blogu “Të shkruash gjelbër”, është një përmbledhje e shkrimeve, opinioneve dhe analizave të mia, të cilat janë botuar në gazeta ditore, revista dhe portale të ndryshme të agjencive të lajmeve por edhe informacioneve tjera të përzgjedhura nga burime të ndryshme dhe nga autorë të ndryshëm.

Vendosa ti përvishem punës në krijimin e këtij blogu dhe përmbledh të gjitha këto shkrime në një blog të vetëm për disa arsye.

Së pari, të gjitha temat e trajtuara në shkrime e kanë në fokus një çështje: mbrojtjen e mjedisit. 

Pastaj, edhe pse këto shkrime kanë qenë të botuara paraprakisht në gazeta, revista e portale, jo të gjithë dashamirësit e shkrimeve për çështjet mjedisore kanë pasur mundësinë ti lexojnë ato, andaj përmes përmbledhjes në një blog, lexuesit do të kenë rastin jo vetëm që ti lexojnë, por edhe të shohin llojllojshmërinë e temave dhe dallimet në mënyrën e qasjes ndaj problemeve të trajtuara. 

Gjithashtu, blogu ofron edhe mundësinë e trajtimit të problemeve edhe përmes shprehjes së opinionit në formë të shkrimeve publicistike, dhe kjo është një mundësi më e mirë për të ndikuar tek publiku në sensibilizimin e tyre për mbrojtjen e mjedisit. 

Duke ditur faktin se në Kosovë, portalet dhe platformat tjera online që në fokus e kanë çështjen e mbrojtjes së mjedisit janë të rrallë, ky blog do të jetë një mundësi më shumë për të pasuruar fondin e burimeve elektonike që trajton këtë çështje.

Prandaj, “Të shkruash gjelbër”, më shumë se një blog është një thirrje për veprim, është një zë i gjelbër dhe një dritare për mbrojtjen e mjedisit i cili shpresoj të ju hyjë në shërbim lexuesve të rëndomtë, nxënësve, studentëve, përfaqësuesve të shoqërisë civile, dashamirësve të mjedisit dhe të gjithë atyre që dëshirojnë të kenë njohuri më të gjëra për çështjet e mjedisit, por edhe atyre  që e pëlqejnë shkrimet me tema mjedisore.

Një pjesë e shkrimeve, opinioneve dhe analizave të publikuara në këtë blog janë të botuara edhe në formatin e një libri me po të njëjtin titull “Të shkruash gjelbër”, por duke e ditur dinamikën e zhvillimeve digjitale vendosa ti ofrojë për lexuesit një gamë më të gjerë shkrimesh në formatin e këtij blogu.

Do të vlerësoja shumë çdo sugjerim, kritikë, koment, lëvdatë apo edhe ndonjë reagim tjetër për blogun në përgjithësi apo edhe për ndonjë nga shkrimet që përmban ai në veçanti. 

Me këtë rast shpreh falënderim të veçantë për miqtë dhe kolegët për komentet, vërejtjet dhe sugjerimet por edhe për shkpërndarjen e shkrimeve, pastaj gazetat ditore, revistat dhe portalet për editimin e shkrimeve të mia, si dhe të gjithë ata që i lexuan shkrimet e mia dhe dhanë komentet dhe opinionet e tyre.

Me shumë respekt, Afrim Berisha PhD