Duke lexuar shkrimet e blogun “Të shkruash
gjelbër”, një nga veçoritë që e ngacmon vëmendjen është diversiteti i temave të
trajtuara dhe përfshirja sektoriale dhe tematike e çështjeve që ngërthen në
vete ai. Në shkrimet, opinonet dhe komentet që e kompletojnë këtë blog i gjejmë
të trajtuara pothuajse të gjitha temat dhe problemet mjedisore duke filluar nga
zonat e mbrojtura, ajri, uji, toka, biodiversiteti, pyjet, mbeturinat,
ndryshimet klimatike etj. Kjo përmbajtje e bënë blogun gjithëpërfshirës, të
larmishëm dhe të këndshëm për lexim.
Një veçori tjetër e blogut është gjuha e
thjeshtë e përdorur në trajtimin e temave. Kjo e bënë blogun tërheqës për tu lexuar jo
vetëm për ata që kanë njohuri për mbrojtjen e mjedisit por edhe për ata që për
herë të parë lexojnë shkrime që në fokus kanë problemet mjedisore. Një
stil i tillë i të shkruarit është i përshtatshëm dhe i lehtë për tu lexuar dhe
për tu kuptuar nga kategori dhe profile të ndryshme lexuesish.
Duke analizuar temat e trajtuara, kuptojmë se
këtu në mënyrë guximshme janë shtjelluar edhe debate dhe çështje që kanë qenë
aktuale në kohën kur janë shkruar, sikurse ishin debatet për Termocentralin
Kosova e Re, Parkun Kombëtar “Bjeshkët e Nemuna”, Integrimet Evropiane, Taksat
mjedisore, Trajtimin e kafshëve apo edhe për Krimet Mjedisore, duke ofruar
argumente dhe fakte bindëse në mbështetje të qëndrimeve të tij.
Në disa segmente të tij blogu trajton edhe
tema shumë specifike mjedisore që shumë rrallë i hasim në spektrin e shkrimeve
dhe analizave mjedisore tek Ne. Të tilla janë për shembull trajtimi i çështjeve
sikurse janë: Ekonomia e Gjelbër, Ekoturizmi, Trajtimin e problemeve mjedisore
në e mediat e shkruara, Ngatërrimet në terminologjinë dhe konceptet mjedisore
etj.
Në disa raste shkrimet e këtij blogu, provojnë
të trajtojnë edhe parashikimet mjedisore për të ardhmen sikurse janë prezantuar
në opinionet: Rritja globale e popullsisë dhe sfidat mjedisore dhe në atë për
Sfidat e gjeneratave të ardhshme në raport me mungesën e ujit.
Në shkrimet dhe opinionet e blogut, përveç
stilit shumë elegant të trajtimit të problemeve gjejmë edhe shumë informata të
rëndësishme që të jep të kuptosh që autori në të gjitha rastet e prezantimit të
opinioneve të tij paraprakisht ka hulumtuar për temën të cilin e ka trajtuar.
Për shumicën e temave të trajtuara janë sjellë
shembuj, praktika, statistika dhe fakte, qofshin ato në nivelin nacional,
rajonal apo global, duke i dhënë kështu blogut një karakter profesionale dhe
duke e pasuruar edhe më shumë përmbajtjen e tij.
Në blogun “Të shkruash gjelbër” në shumë raste
për opinionet dhe shkrimet janë përdorur referenca të ndryshme, citate e burime
qofshin ato nga hulumtime, studime, dokumentet strategjike, baza ligjore,
projekte apo edhe burime tjera relevante për temën e trajtuar, një element ky
që i bënë shkrimet e tij të jenë jo vetëm thjeshtë opinione por më shumë se kaq
të jenë analiza dhe hulumtime profesionale për çështje specifike mjedisore. Një
pjesë e shkrimeve janë marrë nga burime të ndryshme, ku në të shumten e rasteve
janë redaktuar po ka raste kur ato janë publikuar edhe si informata origjinale
nga burimi i informacionit.
Ajo që tërheq vëmendjen gjatë leximit të
shkrimeve te blogut është fakti se në te trajtohen probleme mjedisore në
periudha të ndryshme kohore që e pasuron blogun edhe dimensionin kronologjik
duke prezantuar kështu në një formë edhe zhvillimet kohore dhe progresin e
arritur në sektorin e mbrojtjes së mjedisit. Në këtë aspekt është
shumë e rëndësishme të nënvizohet edhe fakti se disa nga shkrimet edhe
përkundër se ka kaluar kohë kur janë shkruar kanë mbetura shumë aktuale edhe
për kohen e sotme.
Në shumicën e shkrimeve blogu shkon përtej,
pretendimit për të sjellë një infomatë, opinion apo një analizë mjedisore,
sepse ai guxon të japë rekomandime dhe porosi se si të zgjidhen problemet e
caktuara mjedisore, rekomandime këto që janë të qëndrueshme dhe relevante.
Pothuajse në të gjitha rastet problemet e trajtuara në shkrimet janë përpjekje
dhe kontribut për të ndikuar në përmirësimin e gjendjes.
Një pjesë e shkrimeve që i gjejmë në këtë blog
janë si reagime ndaj zhvillimeve mjedisore, që në disa raste e shprehin
mospajtimit me një problem të caktuar mjedisor e në disa raste tjera ato
tentojnë të sugjerojnë për rrugën më të përshtatshme për të zgjidhur problemin
në fjalë. Ky blog lirisht mundë të klasifikohet edhe si një portal kritik
mjedisor për faktin se autori nuk ngurron të identifikojë institucionet
përgjegjëse për një problem të caktuar.
Një veçori tjetër që mundë ti atribuohet
blogut, është edhe karakteri edukativ që ka ai. Duke vënë në pah
kontributin që mundë të japin qofshin individët apo edhe grupet e caktuara në
mbrojtjen e mjedisit apo duke sjellë shembuj konkret të veprimit, shkrimet e
blogut mundë t’i shërbejë secilit për të rritur nivelin e njohurive për
mjedisin apo edhe për të ndryshuar sjelljet në raport me mjedisin.
Ajo që bie në sy dhe që e bënë blogun edhe më
simpatik, është edhe përzgjedhja shumë interesante dhe tërheqëse e titujve të
shkrimeve por edhe e vetë titullit të blogut.
Si përfundim mundë të thuhet lirisht se “Të
shkruash gjelbër”, është një blog multidimensional, i fokusuar në çështjen e
mbrojtjes së mjedisit por që ka edhe vlera të pakontestueshme publicistike,
edukative, hulumtuese e profesionale.
Blogu “Të shkruash gjelbër”, qoftë për nga
temat që trajton, qoftë për nga stili i të shkruarit apo edhe për nga gjithë
përfshirja e problemeve, është një blog unik andaj meriton vëmendjen e lexuesve
dhe atyre që merren me mjedisin.
No comments:
Post a Comment