Rritja e temperaturës globale prej 2 °C do të prekë më shumë se gjysmën e botës

Më shumë se gjysma e popullsisë së botës mund të ekspozohet ndaj thatësirës, përmbytjeve dhe niveleve të rrezikshme të nxehtësisë deri në vitin 2050 nëse temperaturat globale rriten mbi 2 °C mbi nivelet para-industriale, ka gjetur një raport. Vendet më të goditura do të jenë ato që kanë bërë më së paku për të shkaktuar ngrohjen globale, thanë udhëheqësit në samitin Cop26 në Skoci. Bisedimet për ndryshimet klimatike, të cilat kanë hyrë në javën e dytë në Glasgow, synojnë të "mbajnë gjallë 1.5 °C duke siguruar një marrëveshje që do të mbajë rritjen e temperaturave globale nën nivelet që ekspertët thonë se do të jetë katastrofike për shumë specie.

Por pothuajse gjysma e popullsisë së botës mund të jetë ende në rrezik nga një "rrezik klimatik", tha të hënën një raport nga McKinsey and Company. Një rritje prej 2 °C në temperaturat globale do të nënkuptojë se 800 milionë njerëz e më shumë do të luftojnë për të gjetur një furnizim adekuat për ujë, tha raporti. Studimi përshkruan një pamje të disa vendeve që luftojnë për të mbështetur aktivitetin ekonomik për shkak të nxehtësisë.

Rreth 100 milionë njerëz, 1 në 7 fermerë të botës në vitin 2050 do të ekspozoheshin ndaj niveleve të rënda të thatësirës, duke reduktuar aftësinë e tyre për të prodhuar ushqim. 400 milionë njerëz që jetojnë në brigjet e deteve dhe lumenjve do të rrezikonin përmbytjet bregdetare, me vdekje dhe dëme të mëdha materiale.

Nëse ngrohja globale deri në vitin 2050 kalon 2 gradë nga nivelet paraindustriale, objektivi minimal i Marrëveshjes së Parisit, në mesin e popullatave më të varfra në botë do të ketë dy herë më shumë njerëz të ekspozuar ndaj rreziqeve klimatike se sa sot, thotë studimi.

“Realiteti është se ne kemi dështuar botën dhe kemi dështuar komunitetet më të cenueshme që jetojnë në vijat e para”, tha ish-sekretari i përgjithshëm i OKB-së Ban Ki-moon në Cop26.

Simon Kofe, Ministri i Jashtëm i Tuvalu, ofroi një demonstrim se si rritja e nivelit të detit ndikon në kombin e vogël ishullor duke mbajtur fjalimin e tij të regjistruar në konferencë i veshur me kostum dhe kravatë ndërsa qëndronte deri në gjunjë në ujin e detit.

Cop26 ka kërkuar mënyrën më të mirë për të shpenzuar para për të ndihmuar në reduktimin e emetimeve dhe përshtatjen me krizat e shkaktuara nga rritja e deteve, zjarret dhe stuhitë gjithnjë e më intensive të shkaktuara nga ndryshimet klimatike.

Vendet në zhvillim duan më shumë para për kompensim dhe për t'i ndihmuar ata të përshtaten me temperaturat më të larta, ndërsa vendet më të pasura janë fokusuar në mënyrat për të reduktuar emetimet.

Presidenti i Cop26, Alok Sharma tha se vendet duhet të përmbushin angazhimet e marra në javën e parë të samitit nga trajtimi i shpyllëzimit deri te frenimi i energjisë së qymyrit dhe shkurtimi i metanit për të parandaluar ngrohjen e rrezikshme globale.

Vendet e cenueshme kanë shtyrë që vendet e zhvilluara të rishikojnë planet sipas Marrëveshjes së Parisit, të njohura si kontributet e përcaktuara në nivel kombëtar (NDCs).

"Këtu në Glasgow ne kemi një mundësi unike për të arritur një rezultat historik dhe unë jam i përkushtuar të bashkoj vendet për të krijuar një marrëveshje që do të thotë se ne shohim më shumë veprime këtë dekadë, gjë që ndihmon për të mbajtur kufirin e temperaturës prej 1.5 °C  brenda mundësive" tha Sharma.