Lojërat Olimpike Dimërore Pekin 2022 pa emetime!?

Komiteti Olimpik Ndërkombëtar (IOC) lavdëroi Kinën për mbajtjen e premtimeve për organizimin e Lojërave Olimpike me emetim zero, duke futur energji të rinovueshme në vendet e garave. Juan Antonio Samaranch Jr., kreu i IOC për Pekin 2022, deklaroi se është i lumtur dhe krenar që sheh se Pekini i ka kushtuar vëmendje të madhe ambientit, duke përmbushur premtimin për emetim zero për Lojërat, përcjell “Xinhua”. Takimi virtual i IOC u mbajt për të paraqitur përgatitjet teknike për Lojërat Olimpike Dimërore Pekin 2022, duke përfshirë ato që kanë të bëjnë me vendet e zhvillimit, versionin e parë të “Playbook” dhe vijueshmërinë e provave.

Duke shprehur mirënjohje për komitetin organizativ të Lojërave Olimpike Dimërore të Pekinit, Samaranch tha: “Ata janë gati të prezantojnë Lojëra të jashtëzakonshme, pavarësisht periudhës shumë të vështirë për shkak të pandemisë”. Sipas tij, shumë zona ku do të zhvillohen Olimpiket dhe Paraolimpiket furnizohen me energji të rinovueshme, si dielli ose era, dhe kjo është shumë novatore për sa i përket emetimeve të ulëta të karbonit.

Edhe Christophe Dubi, drejtori ekzekutiv i IOC-së për Lojërat Olimpike, foli mirë për përgatitjet për Pekin 2022, ku u morën reagime të mira dhe pikë të larta në eventet testuese, nga federatat dhe sportistët ndërkombëtarë. “Çështjet e mëdha tashmë janë zgjidhur dhe tani që jemi në fazën përfundimtare duhet të përqendrohemi në detajet. Lojërat Olimpike janë gjithmonë një mundësi për ta bashkuar botën”, -theksoi Dubi.