Filloi punimet konferenca e OKB-së për ndryshimet klimatike

Në qytetin Glasgow të Skocisë ka filluar punimet konferenca e 26-të e OKB-së për ndryshimet klimatike (COP26). Kreu i COP26, Alok Sharma, duke vënë në dukje se "po ndizet dhe fiket drita e kuqe" për çështjen e klimës tha se konferenca është shpresa e fundit për të mbajtur rritjen e temperaturës globale në 1.5 gradë Celsius. Në Samitin ku liderët do të marrin pjesë nesër, pritet që të vendoset kufizimi i rritjes së temperaturës globale në 1.5 gradë Celsius në krahasim me epokën para-industriale.

"Ne shohim ndikimin shkatërrues të ndryshimit të klimës në secilin prej vendeve tona. Përmbytje, uragane, zjarre pyjore, temperatura rekorde. Ne e dimë se planeti ynë i përbashkët po përkeqësohet", tha Sharma duke dhënë shembuj gjatë ngjarjeve klimatike për të cilat ka dëshmuar gjatë detyrës së tij, transmeton Anadolu. Ai shtoi se këto mund të zgjidhen vetëm së bashku. Duke rikujtuar se në Marrëveshjen e Parisit për klimën është arritur dakordim që ngrohja globale të mbahet nën 2 gradë Celsius, theksoi se kushtet në ndryshim kërkojnë 1.5 gradë. 

Konferenca është shtyrë për një vit për shkak të pandemisë së koronavirusit të ri (COVID-19), ndërsa tani organizohet në kuadër të masave të COVID-19. Pjesëmarrësit duhet të bëjnë testime të COVID-19 pasi nuk akreditohen ata që nuk janë të vaksinuar. Gjithashtu në kampusin e ngjarjeve skoceze ku po mbahet konferenca, mbajtja e maskës është e detyrueshme, por gjithashtu zbatohet edhe distanca për pjesëmarrësi.